அகிம்சையைப் போதித்து
அனுப்பிவைத்த ஆயுதங்கள்
பிணங்களைப் பரிசளித்தன
புத்தனின் தேசத்திற்கு..
கந்தகநெடி பரவிய
பிணங்களுக்கு அவசரமாய்
பூசப்பட்டது அமைதியின் திரவியம்
சடலங்கள் சிதறிய வெளியெங்கும்
சுற்றிய கழுகுகள் அத்தனைக்கும்
பிரித்தளிக்கப்பட்டன மாயனக் கொல்லைகள்
வரலாற்றை நிறுத்திவைக்க
மாயனக்கொல்லையெங்கும்
பிணங்களைச் சுவைத்தபடி ஓநாயாய்
சுற்றி அலைந்தன ஊடகங்கள்
கல்லறைகள் மறுக்கப்பட்ட
சடலங்கள் கடல் எல்லை தாண்டாமல்
போர்த்தப்பட்ட மஞ்சள் துண்டியில்
கோடிகளின் வாசனை
நானும் காதலிக்க ஆசைப்பட்டேன்
கூடவே காதலிக்கப்படவும்
இவர்களைத்தான் காதலிக்க வேண்டும்
வரையறைகள் உடைப்பட்ட எனது காதலை
எப்படி புரியவைப்பது என
காமத்தை கருவியாக்கி
கவனமாய் ஏய்தேன் ஆனால்
எனது சமுக முகமுடியில் விழுந்த
கீறல்களை சிரிப்பாலும் வார்த்தைகளாலும்
லவகமாக தைத்து காதலைப் பதுக்கினேன்
என்னால் காதலிக்கப்படுபவரின்
சிரிப்பொலிக்கான அர்த்தங்களை
பலவாறு அடுக்கிக் கொண்டே செல்கிறேன்
அவனது வார்த்தைகளின்
இயல்பைக்குறித்து முதன்முதலாய் சிந்தித்தேன்
எங்களது மதுக்கடை சந்திப்பின்
இடைவெளியை நாட்காட்டில்
குறித்துக்கொள்ள தொடங்கினேன்.
அவனுக்காக உதிர்த்த வார்த்தைகளை
அசைபோடத் தொடங்கினேன்.
இந்த உறவின் அழுத்தம் தாளமால்
மறுபடியும்
நானும் காதலிக்க ஆசைப்பட்டேன்
கூடவே காதலிக்கப்படவும்
நேரத்தை ஏமாற்றியபடி
கழிந்த பொழுதுகளை
சுமந்த நாட்களால் நிரம்பி
கொதிக்கிறது மனம்
இரவுகளை எதிர்த்து
சண்டையிட ஆயத்ததுடன்
கடக்கிறேன் எனது வாசலை
தொலைக்காட்சி இறைக்கும்
பிம்பங்களுக்குள் கரைந்து
எனது பிம்பத்தை ஸ்தாபிக்க
அலறும் எனது குரல் மெளனமாய் கடக்கிறது
நிஜங்களை செரித்தபடி
